ઠંડીની ઋતુમાં ઘણીવાર મસાલેદાર અને તળેલું ખાવાની ઈચ્છા થાય છે. આવી સ્થિતિમાં જો તમે નાસ્તામાં અથવા લંચમાં તમારી રેગ્યુલર પ્લેન પુરીમાં બદલાવ કરીને તેને ટેસ્ટી બનાવવા માંગતા હોવ તો ટ્રાય કરો મેથી પુરી. મેથી પુરીનો સ્વાદ નાના બાળકોથી લઈને મોટેરાઓને પણ ખૂબ જ પસંદ આવે છે. તેને ચાની સાથે ખાવાથી મજા પડી જાય છે.
આજે અમે તમને મેથી પુરીની રેસિપી જણાવીશું. ચાલો જાણીએ શિયાળામાં ખાસ મેથી પુરી કેવી રીતે બનાવવી.
સામગ્રી
- ઘઉંનો લોટ – 2 કપ
- બારીક સમારેલા મેથીના પાન – 1 કપ
- ચણાનો લોટ – 1/2 કપ
- કણક ભેળવવા માટે તેલ – 1 ચમચી
- હીંગ – 1 ચપટી
- મીઠું – સ્વાદ મુજબ
- અજમો – 1/4 ચમચી
- તેલ – પુરીઓ તળવા માટે
બનાવવાની રીત
ઘઉંના લોટમાં ચણાનો લોટ, સમારેલી મેથી, હિંગ, મીઠું, અજમો અને તેલ ઉમેરીને બરાબર મિક્સ કરો. થોડું-થોડું પાણી ઉમેરીને સખત કણક બાંધો.
ગૂંથેલા લોટને ઢાંકીને 20 મિનિટ બાજુ પર રાખો. 20 મિનિટ પછી તમારા હાથ પર થોડું તેલ લગાવો અને લોટને થોડો વધુ ગૂંથી લો.
લોટમાંથી નાના-નાના ગુલ્લા બનાવીને બાજુ પર રાખો. બધા ગુલ્લામાંથી પુરી વણી લો અને એક કડાઈમાં તેલ ગરમ કરો.
તેલ ગરમ થાય એટલે તેમાં તળવા માટે પુરી નાખો. જ્યારે પુરી ઉપર આવે ત્યારે ઝારાની મદદથી હળવા હાથે દબાવો, જેથી તે સારી રીતે ફૂલાઈ જાય.
બંને બાજુ પુરી ક્રિસ્પી થઈ જાય ત્યારે પુરીને પ્લેટમાં કઢીને ગરમા ગરમ સર્વ કરો.